جتني ظروف للكدر مستـــــعده
قامت تحدد لي الاحزان ميـــعاد
مرة مع حظي ومرات ضـــده
واليا تكدر خاطر القلب تــزداد
في دنية خلقت على الناس نـده
مردودها للخير تجرح واجهـاد
إتجي على المظلوم وتبيح ســده
واتجي على الظالم تساهيل وامداد
والصدق فيها ما لقى من يــــعده
والكذب يلقى له مع الناس شهاد
واللي فقد حق عجز يســــــترده
يصبح على تسديدة الدين معتاد
ومسكين من راد الزمن يستبده
عيت عليه اقدار الايام تنــــــقاد
تطرح به الدنيا على القاع مـده
مثل الفريسة والمقادير صياد
ضاعت حياته في لحاف ومخده
عدت عليه ايام بغفول ورقــــاد
وماله عن دروب الوعر من يصده
ولا هو عن دروب السلامات نشاد
تلطمه مو جات القدر فوق خـــده
وتخطي به الخطوة من بلاد لبلاد
حبله قريب وعاجز لا يشــــــده
يحسب جميع الناس قاصين وبعاد
عاند حياته لو حياته تـــــــــحده
وادى سنينه كلها عناد بعنــــاد
إصحى من الغفلة ترى العمر حده
للوقت سجاته وللموت ميعاد
وهذي هي الدنيا تجي مستجده
تلقا بها المازح وتلقا بها الجاد
قصة حياة ومننا مستــــــمدة
ويلزمها تنفيذ وإخراج وإعداد
عشنا على كف القدر فوق يده
الله خلقنا عباد ونفني له عباد
ولا حاصل للحي ماكان وده
ولا حاصل للي يموتون ميلاد
ويكفيني اني من ظلوه الموده
ومالي مع الخسران بالدين مقعاد
وإن جتني الغفلة علي اوقات شدة
اصبح لها صداد والقلب صداد
وتقدير ربي مالنا في مرده
ومعارض لتقديره إشراك والحاد